ДУН МАГIАРУЛАВ ВУГО

ГЬУНАР КИНАЗУЛ ЦІЦӏИКІКІАРАБ?

​

BукӀанила, вукӀинчӀила цоцазул хъатир кӀудияв, цояв цояссе цӀакъ ххирияв кӀиго вацц. КӀияссулго лъимал-хъизанги букӀанила, асскӀорегӀан рукъзалги рукӀанила. Гьел ваццал жалго жидеего ххириял ругел гӀадин, гьезул хъизамалги гьединго лъималги цоял цоязе ххириял рукӀанила. Цоязул рокъоб къварилъи ккани, ялъуни гӀатӀилъи ккани, гьебги кӀиязего бащад букӀанила. ХӀассил, кӀиявго вацц, ваццал гӀадин, ваццазул хъизан-лъималги, ваццазул хъизан-лъимал гӀадин рукӀанила.

Ваццазул гьеб божи-рокьиги гьуинлъиги жидер гьунарлъун, жидеда хъизан-лъимал куцазе лъайлъун бихьулаанила, цинги кӀиявго ваццассул чӀчӏужуялда гьеб иш жиндиргоги жиндир дандияй нусалълъулги гьунар букӀин лъалаанила. Щиялълъ жиндирго россассда гьеб гьунар жиндир букӀин бичӀчӀизабулаанила. «Нуж, бихьиналищ, лълъикӀал, ниж, руччабийищ лълъикӀал» абураб суалги россассе кьун, гьелда тӀассан къецц кколаанила.

Цо къоялълъ гьитӀинав ваццасс цо куй хъун букӀанила, асскӀов кӀудияв ваццассулги жиндиргоги вассалги рукӀанила. ГьитӀинав ваццас лъималазухъе цо-цо ургьиссала кьунила. Кодор гьелги кӀанцӀезарулаго, гьев кӀиявго вас кӀудияв ваццассул бакӀалде анила.

Нилӏ ваццги ваццассул хъизамгиян холел рукӀунин, нилӏецца куй хъун букӀарабани, кӀудияб ургьиссала гьессул васассухъе кьун, гьитӀинаб нилӏерго васассухъе кьелаан.

Бихьулищ, гъоз, нилӏер васассухъе гьитӀинаб кьун, жидерго васассухъе кӀудияб кьун буго, - ян гъулгъудизе лӏугьанила кӀудиясул чӀчӏужу.

- Нилӏ гьелилан холел ругеб меххалълъ, гьезул балагьи гьединабищхха букӀараб, ан кӀудияв ваццассулги рак квешлъанила. ГьитӀинав ваццги ахӀун, гьессие бадибчӏвай гьабизе, гьессде семизе, вагъизе ххиял гьабунила гьесс. ЧӀчӏужу, лълъикӀав чияссул пирххи-кьвагьи бихьулищан, балъго елъанхъилей йикӀанила. Цинги гьелълъ россассда абунила:

- ГӀадаллъуге, дир гъарин, цо куялда кӀиго батӀияб: цо кӀудияб, цо гьитӀинаб ургьиссалаги букӀунаро, руччабаз бица-бицаралдаги божун, ххеххдаризе бегьуларо, - ян.

Цинги гьессда бичӀчӀанила ваццлъиги, божилъи цӀуниги, гьоркьоб гьогьен ккезабиги руччабазда бараб букӀин.