ДУН МАГIАРУЛАВ ВУГО

1. Сабаб тIагIараб жо – гIажал, гIадан холеб жо – ххиял.

2. Саву кьарияб, кьаву хIалакъаб.

3. Саву кьун, кьаву босуге.

4. СагърикьотIа гьабураб ГьимагIурухъ батулеб.

5. СагIат гьечIеб рукъ – гIака гьечIеб бокь.

6. СагIат гьечIев беццав, рузнама гьечIев рекъав.

7. СагIаталълъул гIадлу соналълъул гIибадаталдасса лълъикIаб.

8. СагIатгIан ххалатабги букIунебила къо, лъагIелгIан ххалатабги букIунебила.

9. Сайигъат бачIарав – таххида, бачIинчIев – туртида.

10. Сайигъаталълъе кьоло-гъолон чу щварасс цадахъ ярагъги щай гьечIебилан абурабила.

11. «Салам гIалайкумалълъ» гIи гъурараб, апарагасс росу хвараб.

12. Саламалда рекъарабила жавабги букIунеб.

13. Сапаралдасса, гамачI босунги, чIорого рачIунгейила.

14. Сапаралде вахъунесс хъабарча рокъоб тоге.

15. Сапарцадахъ лъазе бокьани, гьессул хьитинибе чIимихх реххейила.

16. Сапнацца чурунилан чIчIегIерцIцIвак хъахIлъиларо.

17. Сариси гуреб букIун бугеб, тIатIи букIун буго (ХIамида оххцер квине щибила лъалеб).

18. Сардил ххалалъи лъалеб унтарассда, къойил ххалалъи лъалеб вакъарассда.

19. Сасу бекуларо, кун тIечIелдасса.

20. Сасу кьун, рукIкIен кьунила рокьи гьабулеб.

21. Сахаб гьой гважуда тIад речIчIулареб.

22. Сахав бахIарчияссе нусго гьунарги дагьаб.

23. Саххаватасс мусру чиядаги балебила, къарумасс жиндаго барабги кIкIунебила.

24. Сахлъи бокьани, бетIер гьогьмада, хIатIал ххинлъуда, чехь бакъун хьихьейила.

Кибего цIцIар рагIарав тоххтир вукIаравила. ГIадамаз гьессда абулеб букIарабила, Аллагьассул къадаралде щоларев чиги вукIанарин, дуцца дурго устарлъиялълъул балъголъи, цадахъ босичIого, ххадур рачIунезе цIунун щайин толареб. Гьессги абулеб букIарабила, жинцца гьеб цадахъ босиларин, жив хун ххадуб, жиндир гъанссинире раккейин, гьениб батилин нужеда жиндир гьунаралълъул балъголъи хъвараб тIехь.

Хванила тоххтир. Ракканила гьессул гъанссинире. Батанила гьениб цIакъ щулаго бухьа-къараб жо. Цо бечедав чиясс, ирсилаз абураб багьаги кьун, босарабила гьеб. Бихха-бичараб меххалълъ гьениб батарабила тIехь. Гьелълъул тIоццебессеб гьумералда ратаралила кицилъун лIугьарал гьадал рагIаби, цогидал гьурмазда щибго хъван батичIебила.

25. Сахлъи букIаго, хIалтIи гьабе, черхх букIаго, ретIел ретIе.

26. Сахлъи гьечIеб унтудассаги нагагьаб балагьалдассаги цIунаги.

27. Сахлъи гьечIев хханассдасса сахлъи бугев лагъго талихIавила.

28. Сахлъи гьечIессе бечелъи щай?

29. Сахлъиги кьун, унти босарав.

30. Сег кванараб чода канлъи бихьулареб, бечелъараб меххалълъ чияссда чияр гIакълу берцин бихьулареб.

31. СихIираб гьимиялдасаги цIунаги, гьуинаб реццалдассаги цIунаги.

32. СихIирав гIабдал.

33. СихIирав чияссулгун даранги гьабуге, гIантав чияссулгун оцги баге.

34. Сордо базаеян гъотIода рещтIараб гъеду гIумруялълъго гьениб ххутIун рагIула.

35. Сордо бачIунареб къо букIунареб.

36. Сордо бецIцIаб бугогIан, цIцIваби гвангъун рукIуна.

37. Сордо къватIиб – ххинкI рокъоб.

38. Сордо сардие те.

39. Сордойилго вачIани, вокьулевги чIалгIуна.

40. Сордо-къо цIцIикIкIарассул гIакълу цIцIикIкIараб.

41. Суалалда рекъон, къокъ гьабун, кье жаваб.

42. Сумал чIалу гьабуге, гьалил михир гьабуге.

43. Сумалда сум лъуни, гул лIугьунеб.

44. Сусур цIцIикIкIаралълъуб бугIа дагьаб, рагIи гIемералълъуб гIакълу дагьаб.

45. Сусур чIаралаго, ролIул чIорал гьоркьоре ккунги ратулел, гIакайилан ккун, хIама бечIчIулелги ратулел.