ДУН МАГIАРУЛАВ ВУГО

1. Таваккал гьечIессул бахIарчи вахъунарев.

2. Таваккал тIаме, хIамаги бухьун.

3. Таваккал тIамурассул мурад тIубалеб.

4. Тайи кIийиллъуда квегъе, лъабиллъуда рекIа.

5. Тайидул чу лIугьинегIан, бетIергьанчияссул гьой лIугьунебила.

6. Такъсирчияссда тIад рекъейги такъсирила.

7. Талган кваназе лъачIого, хварав эмен.

Аби буго талган даруяб жо букIиналълъул хIакъалълъулI.

Цо чияссул даимго чехь унтулеб букIарабила. Гьесс лъималазде васигат гьабун тарабила, щибгIаги жиндир чохьониб бугебали бихьизе, жив хвараб меххалълъ жанире раккичIого рукIунгеян. Гьагъабго чохьол унтиги бахъун, эмен хваравила. Цинги, лъимал чохьонире раккараб меххалълъ, батарабила ххалатккараб цо магьи гIадаб жо.

Эмен ракIалде щвеялълъе васасс гьеб къвакIараб жоялълъул гьабурабила носое тIагъи. Цо нухалълъ, талган чехъолаго, носол тIагьиялълъул талган хъвара-хъвараб бакI биун арабила. Гьеб меххалълъ васасс гьадал рагIаби абуралила.

8. ТалихI бугеб рокъобе «ТуржагIун» лIугьинаро

“ТуржагIун” буго чи хвараб бакIалда цIцIалулеб «Ясеналълъул» цо бутIаялда жаниб бугеб рагIи.

Щибаб сордоялълъ вачIун, будун-дибирасс “Ясен” цIцIалулеб меххалълъ, хварассул лълъадуда гIемерго рагIулеб букIун буго гьаб рагIи. Гьелълъ абун руго кицилъун лIугьарал гьадал рагIаби.

9. ТалихI бугеб рокъое Къоркъочилай лIугьинаро

ТIелекь росдал гIадамазда тIадаб букIун буго лъагIалида жаниб щибаб рукъалълъ жидер нуцалчияссе цо-цо хIалтIул къо гьабизе. Нагагь гьеб тIадаб хIалтIуде щивниги чи камуни, нуцабаз гьессул рокъое Къоркъочилай абулей жидерго гъарабаш йитIулей йикIун йиго. Къоркъочилалълъул иххтияр букIун буго гьеб рокъосса кинаб бугониги цо тIагIел тIасса бищизе ва, годикIанибеги босун, бекизе.

10. ТалихI бугеб чорххол рокьи ккеларо, нухда рилълъин буго дида кIочон тун.

11. ТалихI бугев чияссул чухъил къвал хIулиларо.

12. ТалихI бугезда ккеларо бицун гIадан божулареб, гIодун Аллагь гурхIулареб гьуразул унти.

13. ТалихI бугессул бихьинхIамаги къинлъулебила.

Мискинчияссул букIун буго цо хIама-кIерт. Ма, цо бечедав чи чIчIун вуго гьеб кIерт жиндир бугилан. Ккун руго диваналде. Диваналде вачIине кколеб куц лъалев бечедав чи цояб рахъалдеги цIцIан вачIун вуго. Мискинчи, гъарим, чIового вачIун вуго. Диваналълъ хIамикIерт бечедав чияссул букIин чIчIезабураб меххалълъ, мискинчиясс диванчияссда гьикъун буго -

- Ассул бихьинаб гурони хIамаги гьечIеб меххалълъ, ссунццагIаги ассие гьаб кIерт гьабураб? – ан.

Диванчиясс жаваб кьун буго,

- ТалихI бугев чияссул бихьинхIамаги къинлъула.

14. ТалихI бугессул гвай къаццандулеб.

15. ТалихI бугессул оц ияхI бугессухъе ккела.

16. ТалихI бугессул хIама хIортIа къинлъулебила.

17. ТалихI, гьакил милъир гIадин, ссверулеб, цин тIаде кколеб, цин гъоркье кколеб.

18. ТалихI гIодобе бортун батулареб, чIобого кьолеб жо букIунареб.

19. ТалихI духъан бугони, гIадамалги духъан рукIунел, дур талихI къосани, гIадамазда мунги къосунев.

– ТалихI, кибе бахъараб?

– Гьудуллъи бугелълъубе.

20. ТалихI къарал гурони, къороллъиларо, къо бухIарал гурони, бессдаллъиларо.

21. ТалихI къарасс гурони, къоролай ячинаро, къо бигъарай гурони, къоролассе ккеларо.

22. ТалихI къойил такрарлъуларебила.

23. ТалихI къосарассул кверде къо бухIарав кколевила.

24. ТалихI къосиналдасса къо тIагIинго лълъикIила.

25. ТалихI кьезеги – цо пара, талихI къинеги – цо пара, кIодолъи щвезеги – цо пара, тIасса инеги – цо пара.

26. ТалихIабгIан заман ххеххго унебила.

27. ТалихIалълъе гIорхъи гьечIебила.

28. Тайпа лълъикIалдасса жибго лълъикIаб лълъикIила.

29. Талмикьа талмикье – хьиндаллъи.

30. Тамахаб бихьунила хIамицца заз хIанчIулеб.

31. Тамахьо гьечIев ссонтIохъан – къвачIа гьечIев гьардохъан.

32. Таргьа ракул – гьир богIол.

33. Таргьидаго къачIони, къвачIида букIунареб.

34. Таргьида рекъарабила рукъи балеб.

35. Тариххалълъул дарс – бищун гIакъилаб дарс.

36. Тарщида гьабураб гьойда толареб.

37. ТечIони, катиццаги хъат балеб.

38. Тирибашицца жинццаго гьабулеб, кIкIухIал, чияцца гьабизегIан, валагьун чIчIун вукIунев.

39. Тоххав вехьассул гIи бацIиццаги гъурулеб, гъараялълъги унеб.

40. ТуманкI гьечIев чанахъан, чухъа гьечIев багьадур.

41. ТуманкI лълъикIаб – ххалкъалълъ цIураб, рагIи лълъикIаб – киназулго данде ккараб.

42. Тури гьекъон, къеч хьвалареб, дуниял кваниги, къарум гIорцIцIуларев.

43. Туркидул кири гьечIеб, кочIол хIакъ гьечIеб.

44. ТуркIе, дадал Гъазали!

Кици буго дибирассул хIакъалълъулI. Гъазали вукIун вуго дибирассул вас. Инссулги васассулги квана-гьекъей букIун буго мутагIилзабазда гъорлI. МутагIилзабазул мукъссанаб кванил бутIа жидеего цIцIикIкIун щвеялълъул мурадалда, дибирасс мутагIилзаби гьаб босе, доб босе, цIцIам кье, лълъим кьеян кваниде регIизе толел рукIун гьечIо.

Нижеда лъала гьессие гьабулеб жоян, цо нухалълъ мутагIилзабаз, кваназе гIодор чIчIелалде, дибирасс кьеян абизессеб кинабго жо квер гIунтIулеб бакIалда лъун тун буго. Щибго квалквал ккечIого, абу-абураб жо мутагIилзабаз маго-маян кьураб меххалълъ, васассул мугъзада кверги кIутI-кIутIун, чара хварав дибирасс гьадал рагIаби такрар гьарун руго.

45. Туххум лълъикIай дуего те, жийго лълъикIай дие кье.

46. Тушманзабаздасса диццаго цIунила, Аллагь, гьудулзабаздасса дуцца цIуне.

47. Тушман вукIа абе, гьобол басра гьавуге.

48. Тушман гьавизе бокьани, къарзалълъ гIарац кьейила.

49. Тушман гьекъезаве, гьудул кваназаве.

50. Тушман гьечIолъиги рахIатила.

51. Тушман гIемерлъани, рахIат дагьлъулеб.

52. Тушман камурав бахIарчи вукIунарев, жахIда камурав гIалимчи вукIунарев.

53. Тушман цоги гIемерила, гьудул нусгоги дагьила.

54. Тушманасс веццулелълъул, щайдаян пикру гьабе.

55. Тушманасс дуе гьабураб лълъикIлъи дагьабги цIцIикIкIун бецIе, тIокIав асскIовеги къаге.

56. Тушманасс мун веццулев вугони, биччараб гъалатIалълъул пикру гьабейила.

57. Тушманасс чIвазе бегьула, гьудул ххилиплъизе бегьула, ургъел гьечIесс чIвазеги чIвала, ххилиплъизеги ххилиплъула.

58. Тушманассда бицунареб жо гьудулассдаги бицунге.

59. Тушманассдассанги мисал босизе бегьулебила.

60. Тушманассе – кIал, ватIаналъе – ракI

61. Тушманассе наку чIвазегIан, жиндирго къаданиб зани чIвайго лълъикI.

62. Тушманассе нусго къоги – цо къо.

63. Тушманассе цIакъго кIудияб цIа бакуге, цадахъ мунгоги вухIизе гурин.

64. Тушманассул бетIер, нах бахун, къотIе.

65. Тушманассул рокъоб чIчIегIераб кето ххутIаги.

66. Тушманассухъе кваранаб рахъ кьоге.

67. Тушманги гIакъилав ккве.

68. Тушмангун кьварун вукIа, кьалда лъала багьадур, милатгун хIерен вукIа, хIал бихьулин яхIалълъул.

69. Тушмангун рекъаниги, къолден тIадго те.

70. Тушманлъи бекьани, бекьарасс лъилъулеб.

71. Тушманлъиялълъ макьу толареб.