﷽
دۇن ماعارۇلاو وۇڬۈ
ДУН МАГIАРУЛАВ ВУГО
Лъималазе кинидахъ ахIулел кучIдул
ڸێمالازې كێنێداڅ احۇلېل كۇڃدۇل
Ясазе ахIулел
ياسازې احۇلېل
Эгъегун гъал бащадай, гъолодиссезул бика.
Гъалгун катан гьурщарай лъарагIазул Меседо.
Хинги къокъай бакълъулай, кIаз ххалатай болълъихъей.
ئېغې ڬۇن غال باۺاداي، غۈلۈدێصېزۇل بێكا.
غال ڬۇن كاتان هۇرۺاراي ڸاراعازۇل مېسېدۈ.
ځێنڬێ قۈقاي باقڸۇلاي، گاز خالاتي بۈڷێڅېي.
ГIумаханассул Хижи, ххункарассул Меседо,
Падишагьассул бика, Парзулассул СалтIанат
عۇماخاناصۇل ځێجێ، خۇنكاراصۇل مېسېدۈ،
فادێشاهاصۇل بێكا، فارزۇلاصۇل سالطانات.
ГIарац-месед гIемерай, ГIарабустан баххилай,
Маккаялълъул васазе абидал рагIи кьечIей.
عاراښ - مېسېد عېمېراي، عارابۇستان باخێلاي،
ماڭاياڷۇل واسازې ابێدال راعێ ڨېڃېي
ГIумаханассул Бахуцца Хъорщода лъолеб цIарагI,
Бахул СалтIанатицца лълъим гьекъолеб сурахIи,
СултIан АхIмадил рагьтIа гъулгъудилеб хъахIмикки.
عۇماخاناصۇل باځۇڛا څۈرۺۈدا ڸۈلېب ڝاراع،
باخۇل سالطاناتێڛا ڷێم هېقۈلېب سۇراحێ،
سۇلطان احمادێل راهطا عۇلغۇدێلېب څاحمێڭێ.
ГIодоб чIабаралда чIабатI биччарай,
ЧIалу-раххиялда гIарац бекьарай,
Раса-цIцIалкIу цIцIоролай, цIцIамул гIорто гIарцулай
عۈدۈب ڃابارالدا ڃاباط بێڿاراي،
ڃالۇ - راخێيالدا عاراښ بېڨاراي،
راسا - ڞالگۇ ڞۈرۈلاي، ڞامۇل عۈرتۈ عارښۇلاي.
Ясазе ахIулеб
ياسازې احۇلېب
ЧIоролаби ссихI къотIун ХIотол бусада руго,
Сардицца кваркьи бачун, кьижизарулел руго.
ڃۈرۈلابێ صێح قۈطۇن حۈتۈل بۇسادا رۇڬۈ،
ساردێڛا كوارڨێ باچۇن، ڨێجێزارۇلېل رۇڬۈ.
Кьижа мунги, Сумая, кьижа нижер хIеренай,
ХIикматал макьабацца берцинлъизе гьаб сордо.
ڨێجا مۇنڬێ، سۇمايا، ڨێجا نێجېر حېرېناي،
حێكماتال ماڨاباڛا بېرښێنڸێزې هاب سۈردۈ.
Дур гьулакалда квер лъун кидаго баба йиго,
Кинидахъ кечI ахIизе дахIабабаги йиго.
دۇر هۇلاكالدا كوېر ڸۇن كێداڬۈ بابا يێڬۈ،
كێنێداڅ كېڃ احێزې داحاباباڬێ يێڬۈ.
Кьижа нижер Сумая, ссурмияб зодил тIавус,
ТIогьолI берцинаб гIандус, тIогьиб ахIдолеб гIансса.
ڨێجا نێجېر سۇمايا، صۇرمێياب زۈدێل طاوۇس،
طۈهۈڶ بېرښێناب عاندۇس، طۈهێب احدۈلېب عانصا.
ХIалхьиялда егани лага ххеххго борххила,
Ссванххиялда кьижани кьегIерлъун чIурканлъила.
حالڮێيالدا يېڬانێ لاڬا خېخڬۈ بۈرخێلا،
صوانخێيالدا ڨێجانێ ڨېعېرڸۇن ڃۇرگانڸێلا.
Кьижа, кьижа, Сумая, сордо ххеххго рогьине,
Бакъ баккидал бабацца бубай ццадахъ ячина.
ڨێجا، ڨێجا سۇمايا، سۈردۈ خېخڬۈ رۈهێنې.
باق باڭێدال باباڛا بۇباي ڛاداڅ ياچێنا.
МахI гьуинаб дир гени, кIаркьен багIараб дир гIеч,
ГIандадерил ролIалълъул бищун босараб дир мугь.
ماح هۇئێناب دێر ڬېنێ، گارڨېن باعاراب دێر عېچ،
عاندادېرێل رۈڶاڷۇل بێۺۇن بۈساراب دێر مۇه.
БагIармеседил хIули, гьоло-маргъалул гъуни,
Лага гургинай Бика, габур ххалатай Баху,
Гьаракь берцинаб гагу, габур ссурмияб микки,
ХIатIал багIараб мокъокъ, мукъур чараб чаргъедо.
باعارمېسېدێل حۇلێ، هۈلۈ - مارغالۇل غۇنێ،
لاڬا ڬۇرڬێناي بێكا، ڬابۇر خالاتاي باځۇ،
هاراڨ بېرښێناب ڬاڬۇ، ڬابۇر صۇرمێياب مێڭێ،
حاطال باعاراب مۈقۈق، مۇقۇر چاراب چارغېدۈ.
Росу бакьулI бижараб гъветIги йиго бабал мун,
ГъотIодасса бортараб тIегьги йиго бабал мун,
ТIегьги бортун, бижараб чамассдакги йиго бабал мун.
رۈسۇ باڨۇڶ بێجاراب غوېطڬێ يێڬۈ بابال مۇن،
غۈطۈداصا بۈرتاراب طېهڬێ ئێڬۈ بابال مۇن،
طېهڬێ بۈرتۇن بێجاراب ڃاماصداكڬێ يێڬۈ مۇن.
ХIан къотIулей ятаги, къанцIцI гьабулей ятаги,
Къоло щуго куй хъураб кванил рокъой ятаги.
حان قۈطۇلېي ياتاڬێ، قانڞ هابۇلېي ياتاڬێ،
قۈلۈ ۺۇڬۈ كۇي څۇراب كوانێل رۈقۈي ياتاڬێ.
Габуралда бугеб гIуж, гIоноялда лъураб тIанкI,
Дир берцинай куц бика, камилай ссурат бика, ПатIимат.
ڬابۇرالدا بۇڬېب عۇج، عۈنۈيالدا ڸۇراب طانگ،
دێر بېرښێناي كۇښ بێكا، كامێلاي صۇرات بێكا، فاطێمات.
Кьеларо гъедуялълъе, кьеларо гьудгьудалълъе,
Гочин рекъараб мокъокъ, бакъан берцинаб гIансса, ПатIимат.
ڨێلارۈ غېدۇياڷې، ڨېلارۈ هۇدهۇداڷې،
ڬۈچێن رېقاراب مۈقۈق، باقان بېرښێناب عانصا، فاطێمات.
Жеги тIегь баккилелде тIегьалейги ятаги,
ТIаде бакъ бахилалде кIиябго гъал кьураги, ПатIимат!
جېڬێ طېه باڭێلېلدې طېهالېيڬێ ياتاڬێ،
طادې باق باځێلالدې گێيابڬۈ غال ڨۇراڬێ، فاطێمات.
Кьин ссверун бачIиналде гьарун чагIи рачIаги,
Гьез дуе чакар гIадаб чанги ссайгъат бачIайги, ПатIимат!
ڨێن صوېرۇن باڃێنالدې هارۇن چاعێ راڃاڬێ،
هېز دۇيې چاكار عاداب صايغات باڃاڬێ، فاطێمات.
ГьоцIцIо кIутIун цIцIар лъурайги бабал ай,
ЦIцIибил кIутIун кIал лъурайги бабал ай!
هۈڞۈ گۇطۇن ڞار ڸۇرايڬێ بابال اي،
ڞێبێل گۇطۇن گال ڸۇرايڬێ بابال اي.
Ххайдакъалълъул багIаргIечги бабал ай,
ГIамбаралълъул хъахIаб тIегьги бабал ай!
خايداقاڷۇل باعارعېچڬێ بابال اي،
عامباراڷۇل څاحاب طېهڬێ بابال اي.
Елъулаго кIал берцинай бабал ай,
КIалъалаго бер берцинай бабал ай,
ЧуричIого беркIал хъахIай бабал ай,
ХъвачIого кьенссер чIегIерай бабал ай!
يېڸۇلاڬۈ گال بېرښێناي بابال اي،
گاڸالاڬۈ بېر بېرښێناي بابال اي،
چۇرێڃۈڬۈ بېرگال څاحاي بابال اي،
څواڃۈڬۈ ڨېنصېر ڄېعېراي بابال اي.
Биараб гIарцул тIурай, партIул ролIул гьаюрай,
Меседкунал гIомо гьай, гIарцукунал чалу гьай,
Чакаралълъул кила гьай, Кавказалълъул бурутI гьай.
بێئاراب عارښۇل طۇراي، فارطۇل رۈڶۇل هايۇراي،
مېسېدكۇنال عۈمۈ هاي، عارښۇكۇنال چالۇ هاي،
چاكاراڷۇل كێلا هاي، كاوكازاڷۇل بۇرۇط هاي.
Эгъегун гъал бащадай гъуниссезул Меседо,
Гъалгун габур бащадай кIикIундерил сурахIи.
ئېغې ڬۇن غال باۺاداي غۇنێصېزۇل مېسېدۈ،
غال ڬۇن ڬابۇر باۺاداي گێگۇندېرێل سۇراحێ.
Эбелалълъе йокьулей ракьа гьечIеб чамассдак,
Адаязе ххирияй ххам борцунеб гIарцул натI.
ئېبېلاڷې يۈڨۇلېي راڨا هېڃېب چاماصداك،
ادايازې خێرێياي خام بۈرښۇنېب عارښۇل ناط.
Мугъ берцинай кочIохъан, тIохх берцинай кьурдухъан,
РитIи берцинал кверал, рахъи берцинал хIатIал.
مۇه بېرښێناي كۈڃۈڅان، طۈخ بېرښێناي ڨۇردۇڅان،
رێطێ بېرښێنال كوېرال، راڅێ بېرښێنال حاطال.
ХIатIал мокъокъилай, берал цIцIудулай,
Къудра тIавусилай, бакъан хIанчIчIилай.
حاطال مۈقۈقێلاي، بېرال ڞۇدۇلاي،
قۇدرا طاوۇسێلاي، باقان حانڄێلاي.
ТIину хIалал хIорабахъ лълъалъадилей ятаги
ХIубал гIебал кIалгIабахъ юкъарилей ятаги.
طێنۇ حالال حۈراباڅ ڷاڸادێلېي ياتاڬێ،
حۇبال عېبال گالعاباڅ يۇقارێلېي ياتاڬێ.
Къасси моцIцIгIан цIцIвакарай, цIцIадал лълъимгIан яцIцIадай,
ГIодоб чIабар чIабтIилай, чIалу-раххи гIарцулай.
قاصێ مۈڞعان ڞواكاراي، ڞادال ڷێمعان ياڞاداي،
عۈدۈب ڃابار ڃابطێلاي، ڃالۇ - راخێ عارښۇلاي.
Дур рукъалълъул къадада къого сурахIи баяй,
Гьелълъулги хьибилалда нусго гъадаро баяй.
دۇر رۇقاڷۇل قادادا قۈڬۈ سۇراحێ باياي،
هېڷۇلڬێ ڮێبێلالدا نۇسڬۈ غادارۈ باياي.
БатIи-батIияб тIогьол тIутIун гьаюрай бика,
Берци-берцинаб ххарил ххеххун гьаюрай бика.
باطێ - باطێياب طۈهۈل طۇطۇن هايۇراي بێكا،
بېرښێ - بېرښێناب خارێل خېخۇن هايۇراي بێكا.
Вай дур дада чIахъаяй дардаманалълъул гагу,
Дадал васал чIахъаяй Ххайдакъалълъул багIаргIеч.
واي دۇر دادا ڃاڅاياي دارداماناڷۇل ڬاڬۇ،
دادال واسال ڃاڅاياي خايداقاڷۇل باعارعېچ.
Бакъда щубилI букIунеб бакъан берцинаб мокъокъ,
ХIорлъудуниб букIунеб мукъур ссурмияб микки.
باقدا ۺۇبێڶ بۇگۇنېب باقان بېرښێناب مۈقۈق،
حۈرڸۇدۇنێب بۇگۇنېب مۇقۇر صۇرمێياب مێڭێ.
Берал руго берцинал, щиб кьуниги кьоларел,
Кьунссрул руго гьайбатал, азар гIиял багьаял.
بېرال رۇڬۈ بېرښێنال، ۺێب ڨۇنێڬێ ڨۈلارېل،
ڨۇنصرۇل رۇڬۈ هايباتال، ازار عێيال باهايال.
Азарго гIи къунцIулессе кьела гьай,
Къого гIака бечIчIулессе кьела гьай,
Пулеб гьури гьукъарассе кьела гьай,
Гьалагаб гIор квегъарассе кьела гьай.
ازارڬۈ عێ قۇنڞۇلېصې ڨېلا هاي،
قۈڬۈ عاكا بېڄۇلېصې ڨېلا هاي،
فۇلېب هۇرێ هۇقاراصې ڨېلا هاي،
هالاڬاب عۈر كوېغاراصې ڨېلا هاي.
Вай нижер берцинай, нижер берцинай,
Квассул нухи гIадай нижер берцинай.
Вай, нижер чIухIарай, нижер чIухIарай,
Квасквасул цер гIадай нижер чIухIарай.
واي نێجېر بېرښێناي، نێجېر بېرښێناي،
كواصۇل نۇځێ عاداي نێجېر بېرښێناي.
واي نێجېر ڃۇحاراي، نێجېر ڃۇحاراي،
كواسكواسۇل ښېر عاداي نێجېر ڃۇحاراي.
Ххадижатбика, жанбика, жавгьаралълъул тажбика,
Тамашаяй куцбика, камилай ссуратбика.
خادێجاتبێكا، جانبێكا، جاوهاراڷۇل تاجبێكا،
تاماشاياي كۇښبێكا، كامێلاي صۇراتبێكا.
Бабай, бабай, БатIина,
Щуб чIчIикIулеб гIанкIил тIинчIчI,
Щар чIчIикIулеб катил тIинчIчI,
ГIарцумаххазул ччитIир.
Бакълъахъ гочулеб мокъокъ,
Хьонда пещтIолеб гIансса,
БагIарнагIлил гIанаби,
ГIакдал нахул кIаркьаби,
МахI гьуинаб хIавагIеч.
باباي، باباي، باطێنا،
ۺۇب ڄێگۇلېب عانگێل طێنڄ،
ۺار ڄێگۇلېب كاتێل طێنڄ،
عارښۇماخازۇل ڿێتێر.
باقڸاڅ ڬۈچۇلېب مۈقۈق،
ڮۈندا فېۺطۈلېب عانصا،
باعارناعلێل عانابێ،
عاكدال ناځۇل گارڨابێ،
ماح هۇئێناب حاواعېچ.
БахьинчIимичI чIамурай, чIегIергьоло бекарай,
Нусида хъвараб кверги каранда бакъ гIадинай,
Кодоб босулеб газа меседил хIули гIадай.
باڮێنڃێمێڃ ڃامۇراي، ڃېعېرهۈلۈ بېكاراي،
نۇسێدا څواراب كوېرڬێ كاراندا باق عادێناي،
كۈدۈب بۈسۇلېب ڬازا مېسېدێل حۇلێ عاداي.
Рисалат, росуберцин, росонир ххинкIалберцин,
Гъажалда гIеретIберцин, кIалдиб мучариберцин.
رێسالات رۈسۇبېرښێن، رۈسۈنێر خێنگالبېرښێن،
غاجالدا عېرېطبېرښێن.
ТIанссаялда ссверарай, салмагалда тирарай,
Ссаргъассалълъуй чордарай, чиниялълъуй кванарай,
Риидала щар чIварай, хасало таххтIа чIварай,
Таххтирассул ГIайшат.
طانصايالدا صوېراراي، سالماڬالدا تێراراي،
صارغاصاڷۇي چۈرداراي، چێنێياڷۇي كواناراي،
رێئێدالا ۺار ڃواراي، ځاسالۈ تاخطا ڃواراي،
تاخطێراصۇل عايشات.
Дуе, яс, цIцIар кьун буго гьацIцIудасса гьуинаб.
Берал дуе кьун руго цIцIолбодасса гургинал.
ГIамбаралълъул тIегьги мун, Ххайдакъалълъул гIечги мун.
Эбел йоххарайги мун, росу баххилайги мун.
دۇيې ياس ڞار ڨۇن بۇڬۈ هاڞۇداصا هۇئێناب.
بېرال دۇيې ڨۇن رۇڬۈ ڞۈلبۈداصا ڬۇرڬێنال.
عامباراڷۇل طېهڬێ مۇن، خايداقاڷۇل عېچڬێ مۇن.
ئېبېل يۈخارايڬێ مۇن، رۈسۇ باخێلايڬێ مۇن.
Огь, берцинай, берцинай, беццичIого ссан тарай.
Огь, чIухIарай, чIухIарай, чIарачIого хур тарай.
ГIанкIабазе тIи барай, тIутIацца рахь чIчIикIарай.
Гванзкуйдузе ххер барай, ххуххазе накку барай.
ئۈه بېرښێناي، بېرښێناي، بېڛێڃۈڬۈ صان تاراي.
ئۈه ڃۇحاراي، ڃۇحاراي، ڃاراڃۈڬۈ ځۇر تاراي.
عانگابازې طێ باراي، طۇطاڛا راڮ ڄێگاراي.
ڬوانزكۇيدۇزې خېر باراي، خۇخازې ناڭۇ باراي.
Букъулаго чилай хварай, чурулаго квас хварай,
Макьил ссванххи гурони, мергил дваргъи бахъичIей.
بۇقۇلاڬۈ چێلاي ځواراي، چۇرۇلاڬۈ كواس ځواراي،
ماڨێل صوانخێ ڬۇرۈنێ، مېرڬێل دوارغێ باڅێڃېي.
Рисалат – росу берцин, росонир ххинкIал берцин,
Мугъалда гIеретI берцин, кIалдиб мучари берцин.
رێسالات - رۈسۇ بېرښێن، رۈسۈنێر خێنگال بېرښێن،
مۇغالدا عېرېط بېرښێن، گالدێب مۇچارو بېرښێن.
Биун гIарцул тIурай гьай, партIун ролIул гьаюрай,
Меседкунал гIомо гьай, гIарацкунал чалу гьай,
Чакаралълъул кила гьай, Кавказалълъул бурутI гьай.
بێئۇن عارښۇل طۇراي هاي، فارطۇن رۈڶۇل هايۇراي،
مېسېدكۇنال عۈمۈ هاي، عاراښكۇنال چالۇ هاي،
چاكاراڷۇل كێلا هاي، كاوكازاڷۇل بۇرۇط هاي.
Елъулаго кIалберцин, кIалъалаго цаберцин.
ЧуричIого беркIалхъахI, хъвачIого кьенссерчIегIер.
Ясалазда берцинйихь, берцинай дир меседу.
يـېڸۇلاڬۈ گالبېرښێن، گاڸالاڬۈ ښابېرښێن،
چۇرێڃۈڬۈ بېرگالڅاح، څواڃۈڬۈ ڨېنصېرڄېعېر.
ياسالازدا بېرښێنيێڮ، بېرښێناي دێر مېسېدۇ.
БагIаргьоло чIамаяй, чIегIергьоло бекаяй,
ГIодоб чIабар чIабтIилай, чIалу-рихьи гIарцулай.
Дур рукъалълъул къадада къого сурахIи баяй,
Гьелълъулги хьибилалда анцIго гъадаро баяй.
БатIи-батIияб тIогьол тIутIун гьаюрай гIадай,
Берци-берцинаб ххарил ххеххун гьаюрай гIадай.
باعارهۈلۈ ڃاماياي، ڄېعېرهۈلۈ بېكاياي،
عۈدۈب ڃابار ڃابطێلاي، ڃالۇ - رێڮێ عارښۇلاي.
دۇر رۇقاڷۇل قادادا قۈڬۈ سۇراحێ باياي.
هېڷۇلڬێ ڮێبێلالدا انڝڬۈ غادارۈ باياي.
باطێ - باطێياب طۈهۈل طۇطۇن هايۇراي عاداي.
بېرښێ - بېرښێناب خارێل خېخۇن هايۇراي عاداي.
Эгъегун гъал бащадай гъуниссезул меседу,
Гъалгун габур бащадай кIикIундерил сурахIи.
ئېغېڬۇن غال باۺاداي غۇنێصېزۇل مېسېدۇ،
غالڬۇن ڬابۇر باۺاداي گێگۇندېرۇل سۇراحێ.
Бахьин чIимичI чIамурай, чIегIергьоло бекарай,
Нусида хъвараб кверги каранда бакъ гIадинай,
Кодоб босулеб газа меседил хIули гIадай.
باڮێن ڃێمێج ڃامۇراي، ڄېعېرهۈلۈ بېكاراي،
نۇسێدا څواراب كوېرڬێ كاراندا باق عادێناي،
كۈدۈب بۈسۇلېب ڬازا مېسېدێل حۇلێ عاداي.
Берциналълъа хъамурай, хъахIмаккалълъа йищарай,
Йищун къватIий йосарай, къватIаздаго нур барай.
بېرښێناڷا څامۇراي، څاحماڭاڷا يـێۺاراي،
يێۺۇن قواطێي يېساراي، قواطازداڬۈ نۇر باراي.
Эбелалълъе йокьулей ракьа гьечIеб чамассдак,
Адаязе ххирияй ххам борцунеб гIарцул натI.
ئېبېلاڷې يۈڨۇلېي راڨا هېڃېب چاماصداك،
ادايازې خێرێياي خام بۈرښۇنېب عارښۇل ناط.
Вай, берцинай, берцинай, берциналълъа хъамурай,
ХъахIалълъаги йищарай, щарил нахгIан хIеренай.
ГIоде, гIоде, дир месед, гIанаби багIарлъизе.
ГIоде, гIоде, гьитIинай, бералги чалуххлъизе.
КватIичIого ххасел ун, ххадуб цIцIерги биина.
واي بېرښێناي، بېرښێناي، بېرښێناڷا څامۇراي،
څاحاڷاڬێ يێۺاراي، ۺارێل ناځعان حېرېناي.
عۈدې، عۈدې، دێر مېسېد عانابێ باعارڸێزې.
عۈدې، عۈدې، هێطێناي، بېرالڬێ چالۇخڸێزې.
كواطێڃۈڬۈ خاسېل ئۇن، خادۇب ڞېرڬێ بێئێنا.
ГьоцIцIо кIутIун цIцIар лъурай дир ГIайшат.
Щибил кIутIун бер лъурай дир ГIайшат.
Ххайдакъалълъул гIеч гIадай дир ГIайшат.
ГIамбаралълъул тIегь гIадай дир ГIайшат.
هۈڞۈ گۇطۇن ڞار ڸۇراي دێر عايشات.
ۺێبێل گۇطۇن بېر ڸۇراي دێر عايشات.
خايداقاڷۇل عېچ عاداي دێر عايشات.
عامباراڷۇل طېه عاداي دێر عايشات.
MахI гьуинаб дир гени, кIаркьен багIараб дир гIеч.
ТIиндадерил ролIалълъулI бищун босараб дир мугь.
БагIармеседил хIуби, гьоло-маргъалул гъуни,
Лага гургинай бика, габур ххалатай баху,
Гьаракь берцинаб гагу, габур ссурмияб микки,
ХIатIал багIараб мокъокъ.
ماح هۇئێناب دێر ڬېنێ، گارڨېن باعاراب دێر عېچ.
طێندادېرێل رۈڶاڷۇڶ بێۺۇن بۈساراب دێر مۇه.
باعارمېسېدێل حۇبێ، هۈلۈ - مارغالۇل غۇنێ،
لاڬا ڬۇرڬێناي بێكا، كابۇر خالاتي باځۇ،
هاراڨ بېرښێناب ڬاڬۇ، ڬابۇر صۇرمێياب مێڭێ،
حاطال باعاراب مۈقۈق.
ХIанчIчIи чIирчIидилелде, чIарал хурий яхарай.
ЧIороло борчIилелде, балълъда нахъа кIусарай.
Берцинал къачIалелде, къолое хур лъилъарай.
БагIарбакъ баккилалде, бахъун балълъгун ятарай.
حانڄێ ڃێرڃێدێلېلدې، ڃارال ځۇرێي ياځاراي.
ڃۈرۈلۈ بۈرڃێلېلدې، باڷدا ناڅا گۇساراي.
بېرښێنال قاڃالېلدې، قۈلۈيې ځۇر ڸێڸاراي.
باعارباق باڭێلالدې، باڅۇن باڷڬۇن ياتاراي.
ПатIимат, тIатIул ххинкI, тIатIи буссун, ханал ххинкI,
Хоно чIехьон, пурщина, эбелалълъул ПатIимат.
فاطێمات، طاطۇل خێنگ، طاطێ بۇصۇن، ځانال خێنگ،
ځۈنۈ ڃېڮۈن، فۇرۺێنا، ئېبېلاڷۇل فاطێمات.
Мугъ берцинай кочIохъан, тIохх берцинай кьурдухъан.
РитIи берцинал кверал, рахъи берцинал хIатIал.
مۇغ بېرښێناي كۈڃۈڅان، طۈخ بېرښێناي ڨۇردۇڅان.
رێطێ بېرښێنال كوېرال، راڅێ بېرښێنال.
Гъатун катан гьурщарай лъарагIазул меседу.
Гьадил къали къирщулей, къолол бетIер гьурщулей,
Ишан гьабун, квер хьвагIун, корол рокъой йортулей.
غاتۇن كاتان هۇرۺاراي ڸاراعازۇل مېسېدۇ.
هادێل قالێ قێرۺۇلېي، قۈلۈل بېطېر هۇرۺۇلېي،
ئێشان هابۇن، كوېر ڮواعۇن، كۈرۈل رۈقۈي يۈرتۇلېي.
ХIатIал мокъокъилай, берал цIцIудулай,
Къадру тIавусилай, бакъан хIанчIчIилай.
حاطال مۈقۈقێلاي، بېرال ڞۇدۇلاي،
قادرۇ طاوۇسێلاي، باقان حانڄێلاي.
Гьарун чагIи рачIани, ханзабазе кьеларо.
Азарго гIи къунцIулессе кьела гьай.
Къого гIака бечIчIулессе кьела гьай.
Чакма-хьитал цIцIвакарассе кьела гьай.
Пулеб гьури гьукъарассе кьела гьай.
Гьалагаб гIор квегъарассе кьела гьай.
هارۇن چاعێ راڃانێ، ځانزابازې ڨېلارۈ.
ازارڬۈ عێ قۇنڝۇلېصې ڨېلا هاي.
قۈڬۈ عاكا بېڄۇلېصې ڨېلا هاي.
چاكما - ڮێتال ڞواكاراصې ڨېلا هاي.
فۇلېب هۇرێ هۇقاراصې ڨېلا هاي.
هالاڬاب عۈر كوېغاراصې ڨېلا هاي.
Берал цIцIудулай, хIатIал мокъокъилай,
Макъан хIанчIчIилай, къадру тIавусилай,
Васал сородулей, ясал ццидахуней,
ХIалтIуде регIи бугей, гIолилазул дагIба ккарай,
Кьерилазул кьал бергьарай.
بېرال ڞۇدۇلاي، حاطال مۈقۈقێلاي،
ماقان حانڄێلاي، قادرۇ طاوۇسێلاي،
واسال سۈرۈدۇلېي، ياسال ڛێداځۇنېي،
حالطۇدې رېعێ بۇڬېي، عۈلێلازۇل داعبا ڭاراي،
ڨېرێلازۇل ڨال بېرهاراي.
ВАСАЗЕ АХIУЛЕЛ
واسازې احۇلېل
Инссул хIал ккурав ватаги,
ХIамил рачIчI ккурав ватаги,
Гьагьицца рак баччарав ватаги,
Гъажалда ах гьабурав ватаги,
ХIинццлъи гьечIев ватаги,
ХIалай ватулев ватаги.
ئێنصۇل حال ڭۇراو واتاڬێ،
حامێل راڄ ڭۇراو واتاڬێ،
هاهێڛا راك باڿاراو واتاڬێ،
غاجالدا اځ هابۇراو واتاڬێ،
حێنڛڸێ هېڃېو واتاڬێ،
حالاي واتۇلېو واتاڬێ.
МутагIиллъун вукIине ГIандивеги витIила.
ГIалимчилъун вахъине МелъелтIеги витIила.
ТIугьдузул ххулжалги цIун, Воххун щвела бабахъе,
Хьулазул кисаял цIун, РещтIина гьудулалълъухъ.
مۇتاعێلڸۇن وۇگێنې عاندێوېڬێ وێطێلا.
عالێمچێڸۇن واڅێنې مېڸېلطېڬێ وێطێلا.
طۇهدۇزۇل خۇلجالڬێ ڝۇن، وۈخۇن ۺوېلا باباڅې،
ڮۇلازۇل كێسايال ڝۇن، رېۺطێنا هۇدۇلاڷۇڅ.
Газа-бел гузилав, раххан ххурххилав,
Ххалеб гъотIол пихъил гъунал чIахIияв.
ڬازا - بېل ڬۇزێلاو، راخان خۇرخێلاو،
خالېب غۈطۈل فێڅێل غۇنال ڃاحێياو
Лаилагь иллаллагь, кьижа дир месед,
Мун кIудияв гIеяв, дуниял щваяв!
Лаилагь иллаллагь, кьижа дир лълъикIав,
Дур ракIалълъ йищарай ячила дуе!
Лаилагь иллаллагь, кьижа дир ххирад,
Я БетIергьан Аллагь цIуне гьав дир вас!
لا اله الا الله، ڨێجا دێر مېسېد،
مۇن گۇدێياو عېياو، دۇنێيال ۺواياو.
لا اله الا الله، ڨێجا دێر ڷێگاو،
دۇر راگاڷ يێۺاراي ياچێلا دۇيې،
لا اله الا الله، ڨێجا دێر خێراد،
يا بېطېرهان الله ڝۇنې هاو دێر واس.
БацIида кIалдисса цIигьан бахъарав,
ЦIиркъида бадисса магIу бикъарав.
Борхьил чохьониссан чол нух бахъарав,
Чабхъада гьунарал гIемер росарав.
باڝێدا گالدێصا ڝێهان باڅاراو،
ڝێرقێدا بادێصا ماعۇ بێقاراو.
بۈرڮێل چۈڮۈنێصان چۈل نۇځ باڅاراو،
چابڅادا هۇنارال عېمېر رۈساراو.
КIанцIун чоде вахарав, чIухIун ярагъ борчарав,
Беххе унеб ххеххаб гIор, жанив кIанцIун, бахарав,
ХхарилI бугеб аздагьо, кIихIи къотIун, реххарав,
Лъабнухида хъала бан, тушбабигун вагъарав.
گانڝێن چۈدې واځاراو، ڃۇحۇن ياراغ بۈرچاراو،
بېخې ئۇنېب خېخاب عۈر، جانێو گانڝۇن، باځاراو،
خارێڶ بۇڬېب ازداهۈ، گێحێ قۈطۇن، رېخاراو،
ڸابنۇځێدا څالا بان، تۇشبابێڬۇن واغاراو.
Зодор ругел цIцIаназе, хIорде рачун, цIцIам кьурав,
ЦIцIорор ругел ритIучIал, чагъана хъван, кьурдарав,
Чол кьолонив кьурдарав, кьибилалда нур барав,
…БогIол цагъур кIудияв, чIчIалда мохмох биццатав
زۈدۈر رۇڬېل ڞانازې، حۈردې راچۇن، ڞام ڨۇراو،
ڞۈرۈر رۇڬېل رێطۇڃال، چاغانا څوان، ڨۇرداراو،
چۈل ڨۈلۈنێو ڨۇرداراو، ڨێبێلالدا نۇر باراو،
بۈعۈل ښاغۇر گۇدێياو، ڄالدا مۈځمۈځ بێڛاتاو.
Вай, МухIамад – хIенхIил гъветI,
ХIехь багIараб гIечул гъветI,
ГIазухъахIаб мокьрол гъветI,
Бикьун щвараб тIогьол гъветI
ТIепун щвараб цIцIороссаролI.
واي مۇحاماد حېنحێل غوېط،
حېڮ باعاراب عېچۇل غوېط،
عازۇڅاحاب مۈقرۈل غوېط،
بێقۇن ۺواراب طۈهۈل غوېط
طېفۇن ۺواراب ڞۈرۈصارۈڶ.
БакьулI гIамбар хъвараб гIусмани месед,
Меседил ххатI хъвараб миссрияб ххвалчен.
Багьа кьун босараб бидаяб айгъир,
Ахх – кьижа, кьижа, ххеххго кIудияв гIезе.
باڨۇڶ عامبار څواراب عۇسمانێ مېسېد،
مېسېدێل خاط څواراب مێصرێياب خوالچېن.
باها ڨۇن بۈساراب بێداياب ايغێر،
اخ ڨێجا، ڨێجا خېخڬۈ گۇدێياو عېزې.
Бохх басандун, ракI басандун,
Вахъа, МухIамад, кIанцI-кIанцI.
КIанцIе, кIанцIе, дир микьир,
КIанцIе, кIанцIе, дир месед.
بۈخ باساندۇن، راگ باساندۇن،
واڅا، مۇحاماد، گانڝ - گانڝ.
گانڝې، گانڝې، دێر مێڨێر،
گانڝې، گانڝې، دێر مېسېد.
Этекал тIогьилал, тIаргъал багIарал
Цо къокъа баккила къилбаялдассан.
Язихъал рахина тIохил рагIалде
ТIолго ссугъуралълъул ретIелги ретIун.
Дицца мун витIила жамагIаталде
Инссул дуй ххутIараб хурайсенги лъун.
ئېتېكال طۈهێلال، طارغال باعارال
ښۈ قۈقا باڭێلا قێلبايالداصان.
يازێڅال راځێنا طۈځێل راعالدې
طۈلڬۈ صۇغۇراڷۇل رېطېلڬێ رېطۇن.
دێڛا مۇن وێطێلا جاماعاتالدې
ئێنصۇل دۇي خۇطاراب ځۇرايسېنڬێ ڸۇن.
Гъал меседил чодулав, вачIа, вачIа бабахъе.
Вахъун вачIа бабахъе, дуре, дуре дадахъе.
Гьарун бараб цIцIадал щуб, цIцIалун щвараб бакъул нур.
АхIизе цIцIар берцинав, бихьизе куц беричав.
Гьанги белъун, чед бежун, Чанавеги унев ав.
Чуги бачун, цIцIал кьабун, ЦIцIоровеги унев ав.
غال مېسېدێل چۈدۇلاو، واڃا، واڃا باباڅې.
واڅۇن واڃا باباڅې، دێرې، دۇرې داداڅې.
هارۇن باراب ڞادال ۺۇب، ڞالۇن ۺواراب باقۇل نۇر.
احێزې ڞار بېرښێناو، بێڮێزې كۇښ بېرێچاو.
هانڬێ بېڸۇن، چېد بېجۇن، چاچاناوېڬێ ئۇنېو او.
چۇڬێ باچۇن، ڞال ڨابۇن، ڞۈرۈوېڬێ ئۇنېو او.
Гьарун кьураб цIцIад гIадинав эбел ав.
ЦIцIалун кьураб бакъ гIадинав эбел ав.
Бакъ-моцIцIалълъул канлъи гIадав авлъидал.
Кереналълъул ракI гIадинав авлъидал.
هارۇن ڨۇراب ڞاد عادێناو ئېبېل او.
ڞالۇن ڨۇراب باق عادێناو ئېبېل او.
باق - مۈڞاڷۇل كانڸێ عاداو اوڸێدال.
كېرېناڷۇل راگ عادێناو اوڸێدال.
РакIалълъулги кIулал гIадав авлъидал.
КIулал рараб гъамасс гIадав авлъидал.
Гъанссинибги месед гIадав бабал ав.
راگاڷۇلڬێ گۇلال عاداو اوڸێدال.
گۇلال راراب غاماص عاداو اوڸێدال.
غانصێنێبڬێ مېسېد عاداو بابال او.
ГьоцIцIо кIутIун, кIал гъурав,
ЦIцIибил кIутIун, бер гъурав,
Рачлихъ чакар гIадинав,
Чвантиниб гIарац гIадав,
Охол ролълъул ххинкI гIадав,
Ххасел ролълъул чед гIадав,
КьурулI милълъиршо гIадав,
Якъаралълъуб квенги – мун,
Къечаралълъуб лълъимги – мун.
هۈڞۈ گۇطۇن، گال غۇراو،
ڞێبێل گۇطۇن، بېر غۇراو،
راچلێڅ چاكار عادێناو،
چوانتێنێب عاراښ عاداو،
ئۈځۈل رۈڶۇل خێنگ عاداو،
خاسېل رۈڶۇل چېد عاداو
ڨۇرۇڶ مێڷێرشۈ عاداو،
ياقاراڷۇب كوېنڬێ مۇن،
قېچاراڷۇب ڷێمڬێ مۇن.
Бералберцин – цидул тIинчIчI,
ЦабигIиссин – гIанкIкIил тIинчIчI,
ГIундул къокъаб бацIил тIинчIчI,
Ххеххлъи гьабун кIудав гьав!
بېرالبېرښێن ښێدۇل طێنڄ،
ښابێعێصێن عانڴێل طێنڄ،
عۇندۇل قۈقاب باڝێل طێنڄ،
خېخڸێ هابۇن گۇداو هاو.
Тушбабазда речIчIулеб чIорбутIлъундай вахъина,
ЧIухIдаего хьвадулев хъергъулъундай лIугьина.
Дандиялги ххадур тун, кIанцIунгодай ина мун,
Ццере ругел нахъа тун, векерунгодай ина, –
Дунял ссверун вуссунев, бабал ссурмияб микки.
تۇشبابازدا رېڄۇلېب ڃۈربۇطڸۇنداي واڅێنا،
ڃۇحدايېڬۈ ڮوادۇلېو څېرغۇڸۇنداي ڶۇهێنا.
داندێيالڬێ خادۇر تۇن، گانڝۇنڬۈداي ئێنا مۇن،
ڛېرې رۇڬېل ناڅا تۇن، وېكېرۇنڬۈداي ئێنا،
دۇنيال صوېرۇن وۇصۇنېو، بابال صۇرمێياب مێڭێ.
Боял рахъаралълъув чу багьадурав,
ЧагIи рахъаралълъув рагъ гъалбацIилав,
ГодекIаниб кьибил кьуркьузабурав,
Кьалда бахIарзалги хIинкъизарурав,
Росдал гIадамалгун гIамал рекъарав
Ваццлъун вихьаги мун тIулил яццазда.
بۈيال راڅاراڷۇو چۇ باهادۇراو،
چاعێ راڅاراڷۇو راغ غالباڝێلاو،
ڬۈدېگانێب ڨێبێل ڨۇرڨۇزابۇراو،
ڨالدا باحارزالڬێ حێنقێزارۇراو،
رۈسدال عادامالڬۇن عامال رېقاراو،
واڛڸۇن وێڮاڬێ مۇن طۇلێل ياڛازدا.
Месед цIунулеб кIуни, кIулал рахалеб гъамасс,
Гъанссиниб лъолеб сагIат, санкIиниб лъолеб гIарац.
مېسېد ڝۇنۇلېب گۇنێ، گۇلال راځالېب غاماص،
غانصێنێب ڸۈلېب ساعات، سانگێنێب ڸۈلېب عاراښ.
КIанцIун чоде вахарав, чIухIун ярагъ борчарав,
Беххе унеб ххеххаб гIор жанив кIанцIун бахарав.
ХхарилI бугеб аздагьо кIихIи къотIун реххарав,
Лъабнухида хъала бан, тушбабигун вагъарав.
گانڝۇن چۈدې واځاراو، ڃۇحۇن ياراغ بۈرچاراو،
بېخې ئۇنېب خېخاب عۈر جانێو گانڝۇن باځاراو.
خارێڶ بۇڬېب ازداهۈ گێحێ قۈطۇن رېخاراو،
ڸابنۇځێدا څالا بان، تۇشبابێڬۇن واغاراو.
Ярагъ чаран, чу гьалаг, чвархъан вегьила тIаде.
Чу гьалагав багьадур рещтIина эбелалда.
Ярагъалълъул чвархъухъе чагIи нахъ балагьарав,
Чодул малал тIваркъухъе тIуркIун эбел йорчIарав.
ياراغ چاران، چۇ هالاڬ، چوارڅان وېهێلا طادې.
چۇ هالاڬاو باهادۇر رېۺطێنا ئېبېلالدا.
ياراغاڷۇا چوارڅۇڅې چاعێ ناڅ بالاهاراو،
چۈدۇل مالال طوارقۇڅې طۇرگۇن ئېبېل يۈرڃاراو.
Ва хIатуту, хIатуту, хIотол мегеж кIалдиссев,
КIалги мацIцIги ЦIцIороссев, цIцIалги чуги меседил,
Васа-вакун тIагьур лъурав, тIаргъиниве хъивихъарав,
Хъабчиниве гевегарав, щугоявгун щурщударав,
Щугоявгун векерарав, векерун куй босарав,
Керен чIван оц босарав, булбулалълъул мугъалда
Рагъуе хъала барав, хъахIилаб ралъадалда
БагIараб цIа бакарав, цIел хIуби хIалае ккун,
Зобалазде вахарав, зодор ругел цIцIаназе
ХIорде рачун цIцIан кьурав, цIцIорор ругел ритIучIал
Чагъана хъван кьурдарав, чол кьолонив кьурдарав,
Кьибилалда нур барав, эххев унессе лIар цIурав,
Эххеде унессе тIутI лъурав, богIол цагъур кIудияв,
ЧIчIалда мохмох биццатав.
وا حاتۇتۇ، حاتۇتۇ، حۈنۈل مېڬېج گالدێصېو،
گالڬێ ماڞڬێ ڞۈرۈصېو، ڞالڬێ چۇڬێ مېسېدێل،
واسا - واكۇن طاغۇر ڸۇراو، طارغێنێوې څێوێڅاراو،
څابچێنێوې ڬېوېڬاراو، ۺۇڬۈياوڬۇن ۺۇرۺۇداراو،
ۺۇڬۈياوڬۇن وۈكېراراو، وېكېرۇن كۇي بۈساراو،
كېرېن ڃوان ئۈښ بۈساراو، بۇلبۇلاڷۇل مۇغالدا
راغۇيې څالا باراو، څاحێلاب راڸادالدا
باعاراب ڝا باكاراو، ڝېل حۇبێ حالايې ڭۇن،
زۈبالازدې واځاراو، زۈدۈر رۇڬېل ڞانازې
حۈردې راچۇن ڞان ڨۇراو، ڞۈرۈر رۇڬېل رێطۇڃال.
چاغانا څوان ڨۇرداراو، چۈل ڨۈلۈنێو ڨۇرداراو،
ئېخېدې ئۇنېصې طۇط ڸۇراو، بۈعۈل ښاغۇر گۇدێياو،
ڄالدا مۈخمۈخ بێڛاتاو.
БацIида кIалдисса цIигьан бахъарав,
ЦIиркъида бадисса магIу бикъарав,
Борхьил чохьониссан чол нух бахъарав,
Чабхъада гьунарал гIемер росарав,
Дурго эбелалда чилъун вихьаги,
Чияр эбелалда дурц гIун вихьаги.
باڝێدا گالدێصا ڝێهان باڅاراو،
ڝێرقێدا بادێصا ماعۇ بێقاراو،
بۈرڮێل چۈڮۈنێصان چۈل نۇځ باڅاراو،
چابڅادا هۇنارال عېمېر رۈساراو،
دۇرڬۈ ئېبېلالدا چێڸۇن وێڮاڬێ،
چێيار ئېبېلالدا دۇرڛ عۇن وێڮاڬێ.
КIигоявгун къаццандарав, къогоявгун гаргадарав,
Векерун куй босарав, керен чIван оц босарав,
Агъалда гъалбацIилав, гъажалда ритIучIилав,
РитIучIалълъул лIарада лълъамамесед бекьарав.
گێڬۈياوڬۇن قاڛانداراو، قۈڬۈياوڬۇن ڬارڬاداراو،
وېكېرۇن كۇي بۈساراو، كېرېن ڃوان ئۈښ بۈساراو،
اغالدا غالباڝێلاو، غاجالدا رێطۇڃێلاو،
رێطۇڃاڷۇل ڶارادا ڷامامېسېد بېڨاراو.
Белъанхъулеб микьир, кьурдулеб кокан,
Мун гьавураб сардида, найил гьацIцIул цIцIад барав.
Гьавун къватIив вахъиндал, къватI-къватIазда нур барав.
بېڸانڅۇلېب مێڨێر، ڨۇردۇلېب كۈكان،
مۇن هاوۇراب ساردێدا، نايێل هاڞۇل ڞاد باراو.
هاوۇن قواطێو واڅێندال، قواط - قواطازدا نۇر باراو.
Мунгун гIолилалълъе, гIел бащадалълъе
ГIарцул гвагьар бараб гьитIинаб канлъи.
ГIолилал васазе гьудулзабазе,
Гьавагун квачI балеб гогьаб бартичу.
Меседил чолода чуги базабун,
Чабхъацца рачIаги дуцца тушбаби.
مۇنڬۇن عۈلێلاڷې، عېل باۺاداڷې
عارښۇل كواهار باراب هێطێناب كانڸێ.
عۈلێلال واسازې هۇدۇلزابازې،
هاواڬۇن كواڃ بالېب كۈهاب بارتێچۇ.
مېسېدێل چۈلۈدا چۇڬێ بازابۇن،
چابڅاڛا راڃاڬێ دۇڛا تۇشبابێ.
Мунгун гIолилацца чу кьолозегIан
Чода бараб гIетIалълъ беркIал чураги.
Мунгун дандияцца ярагъ базегIан,
Инссул азбаралълъуб чу басандаги.
مۇنڬۇن عۈلێلاڛا چۇ ڨۈلۈزېعان
چۈدا باراب عېطاڷ بېرگال چۇراڬێ.
مۇنڬۇن داندێياڛا ياراغ بازېعان،
ئێنصۇل ازباراڷۇب چۇ باسانداڬێ.
Инссул кьагIада ццеве кьурдулаго ватаги.
Кьолбол васазда ццеве векерухъе вачIаги.
Эххеб унеб ххеххаб гIор хапун чое рекIаги.
Чол кьолокь бахъунеб хIур гьаваялда бетаги.
ХхарилIе квешаб борохь чол цIцIалае хьвагIаги.
ئێنصۇل ڨاعادا ڛېوې ڨۇردۇلاڬۈ واتاڬێ.
ڨۈلبۈل واسازدا ڛېوې وېكېرۇڅې واڃاڬێ.
ئېخېب ئۇنېب خېخاب عۈر ځافۇن چۈيې رېگاڬێ.
چۈل ڨۈلۈڨ باڅۇنېب حۇر هاوايالدا بېتاڬێ.
خارێڶې كوېشاب بۈرۈڮ چۈل ڞالايې ڮواعاڬێ.
Чанахъанассул бер гIадинав лIугьаги,
БегIераб гIащтIи гIадинав ватаги.
چاناڅاناصۇل بېر عادێناو ڶۇهاڬێ،
بېعېراب عاۺطێ عادێناو واتاڬێ.
БагIармеседил си, сала мугIрул тIогь,
ТIегь мегIералълъул ххер, ххарилIе булбул.
باعارمېسېدێل سێ، سالا مۇعرۇل طۈه،
طېه مېعېراڷۇل خېر، خارێڶې بۇلبۇل.
Эгъе хъахIаб чу рекIун, чвархъиялда вачIаяв.
Чол багьаяб кьили лъун, дваргъиялда вачIаяв.
Нодо хъахIаб ци чIваяв, ца гIебаба хъабан чIваяв,
ХъахIилаб ралъадалда багIараб цIцIа бакаяв.
ئېغې څاحاب چۇ رېگۇن، چوارڅێيالدا واڃاياو.
چۈل باهاياب ڨێلێ ڸۇن، دوارغێيالدا واڃاياو.
نۈدۈ څاحاب ݭێ ڃواياو، ښا عېبابا څابان ڃواياو،
څاحێلاب راڸادالدا باعاراب ڞا باكاياو.
ГIали хъаме, богIоло, дир МухIамад кьеларо.
ПатIи хъаме, хъамало, дир ххирад дуй кьеларо.
ГIумар хъаме, богIоло, дир дарман дуй кьеларо.
ГьатIи-кIодой вокьулев, ракьа къачIеб чамассдак,
КIодо-бабай ххирияв, ххам борцунеб гIарцул натI.
عالێ څامې، بۈعۈلۈ، دێر مۇحاماد ڨېلارۈ.
فاطێ څامې، څامالۈ، دێر خێراد دۇي ڨېلارۈ.
عۇمار څامې، بۈعۈلۈ، دێر دارمان دۇي ڨېلارۈ.
هاطێ گۈدۈي وۈڨۇلېو، راڨا قاڃېب چاماصداك،
گۈدۈ باباي خێرێياو، خام بۈرښۇنېب عارښۇل ناط.
Гъассде гиргидулеб меседил горо,
Рукъ бакьулI тIамулеб гIарцул дандерик,
Чамассдакул гъотIокь бищардулеб хIинчIчI,
ТIад рас меседилаб хъурайсин кьегIер,
Ххадув мунги гьавун, хьвадила эбел.
غاصدې ڬێرڬێدۇلېب مېسېدێل ڬۈرۈ،
رۇق باڨۇڶ طامۇلېب عارښۇل داندېرێك،
چاماصداكۇل غۈطۈڨ بێۺاردۇلېب حێنڄ،
طاد راس مېسېدێلاب څۇرايسێن ڨېعېر،
خادۇو مۇنڬێ هاوۇن، ڮوادێلا ئېبېل.
Ахх абидал, ххирияб ххаринисса тIогьол гул,
ТIиндисса багIаргьоло, Гьолокьа хъахIаб цIцIибил,
ЦIцIороса багIараб гIеч, ахх-абун кьижун вукIа.
اخ ابێدال، خێرێياب خارێنێصا طۈهۈل ڬۇل،
طێندێصا باعارهۈلۈ، هۈلۈڨا څاحاب ڞێبێل،
ڞۈرۈصا باعاراب عېچ، اخ ابۇن ڨێجۇن وۇگا.
МухIамад – хIенхIил гъветI,
ХIехь берцинаб гIечул гъветI,
ГIазухъахIаб мокьрол гъветI,
Бикьун щвараб тIогьол гъветI,
ТIепун щвараб цIцIороссаролI.
مۇحاماد حېنحێل غوېط،
حېڮ بېرښێناب عېچۇل غوېط،
عازۇڅاحاب مۈڨرۈل غوېط،
بێڨۇن ۺواراب طۈهۈل غوېط،
طېفۇن ۺواراب ڞۈرۈصارۈڶ.
Бералберцин, цидул тIинчIчI,
Цабиберцин, гIанкIкIил тIинчIчI,
ГIамалберцин, бацIил тIинчIчI,
Балъго лъалеб, царал тIинчIчI.
بېرالبېرښێن، ښێدۇل طێنڄ،
ښابێبېرښێن، عانڴێل طێنڄ،
عامالبېرښێن، باڝێل طێنڄ،
باڸڬۈ ڸالېب، ښارال طێنڄ.
БагIаргIечул рохьоре чанги нухал гьарила.
Чан толарев мун дирги чанадизе хьвадила,
Ххарда кьегIер гIадинан, васандизе лIугьина.
باعارعېچۇل رۈڮۈرې چانڬێ نۇځال هارێلا.
چان تۈلارېو مۇن دێرڬێ چانادێزې ڮوادێلا،
خاردا ڨېعېر عادێنان، واساندێزې ڶۇهێنا.
ГIака къинлъизегIан чIчIарав, цIцIо тIезегIан чIчIарав,
ЦIцIорозегIан чIчIечIого, кIалги бухIун, хварав.
عاكا قێنڸێزېعان ڄاراو، ڞۈ طېزېعان ڄاراو،
ڞۈرۈزېعان ڄېڃۈڬۈ، گالڬێ بۇحۇن، ځواراو.
БеркIал чуруларев чорокав АхIмад,
Чурун рацIцIунарел къаргIадал кверал,
ЦIадукьаялдасса лълъекьа хIинкъулев,
ХIатIалги рукIуна «нисугIан» хъахIал.
بېرگال چۇرۇلارېو چۈرۈكاو احماد،
چۇرۇن راڞۇنارېل قارعادال كوېرال،
ڝادۇڨايالداصا ڷېڨا حێنقۇلېو،
حاطالڬێ رۇگۇنا نێسۇعان څاحال.
Гьабилессеб тарав, телеб гьабурав,
МалълъичIеб босарав, кьечIеб кванарав,
Тамахьо цIцIалаго гурде бухIарав,
Гьабураб-бахъарав хъабхъил цIурачед.
هابێلېصېب تاراو، تېلېب هابۇراو،
ماڷێڃېب بۈساراو، ڨېڃېب كواراناراو،
تاماڮۈ ڞالاڬۈ ڬۇردې بۇحاراو،
هابۇراب باڅاراو څابڅێل ڝۇراچېد.
Расандизе рикIкIунел
راساندێزې رێڴۇنېل
Мунги дунги - кIиялго,
КIитIикIатIар - лъабалго,
Лъебел ГIали - ункъалго,
ГIалил хIама - щуялго,
ШайихмухIамад - анлIалго
Рилълъа цадахъ ахикье,
Ахбазан бакIаризе.
مۇنڬێ دۇنڬێ گێيالڬۈ،
گێطێگاطار ڸابالڬۈ،
ڸېبېل عالێ ئۇنقالڬۈ،
عالێل حاما ۺۇيالڬۈ،
شايێخمۇحاماد انڶالڬۈ
رێڷا ښاداڅ اځێڨې،
اځبازان باگارێزې.
ГIалил лъимал гъулгъуди,
ГъологIучIчIал квалквади,
Кив вукIарав, кIалберцин?
عالێل ڸێمال غۇلغۇدێ،
غۈلۈعۇڄال كوالكوادێ،
كێو وۇگاراو، گالبېرښێن؟
ЦIцIум, цIцIум, гвед, гвед,
ЦIцIумазул рукъ бихх, бихх!
ڞۇم، ڞۇم، ڬوېد، ڬوېد،
ڞۇمازۇل رۇق بێخ، بێخ!
Гьадаб балагьуда тIегь буго,
ТIогьиб маххул ххеч буго,
Аххада гьабал руго,
Гьабахъ гIадамал руго,
ГIадамахъ кини буго,
Кини цIун багIар буго,
БагIар пуруцца ана,
ГIурул кету лъабчIвана,
Лъарал кету ункъчIвана,
Ункъо букIараб чогьен
ЧехьатIаде реххана.
هاداب بالاهۇدا طېه بۇڬۈ،
طۈهێب ماخۇل خېچ بۇڬۈ،
اخادا هابال رۇڬۈ،
هاباڅ عادامال رۇڬۈ،
عاداماڅ كێنێ بۇڬۈ،
كێنێ ڝۇن باعار بۇڬۈ،
باعار فۇرۇڛا انا،
عۇرۇل كېتۇ ڸابڃوانا،
ڸارال كېتۇ ئۇنقڃوانا،
ئۇنقڬۈ بۇگاراب چۈهېن
چېڮاطادې رېخانا.
Маргьа, маргьа, цIило, цIило,
Цинги гъеду, Гъуниб росу,
Росдал цIцIани, ЦIцIоросса кету,
Кутул гIундул, гIондокьил наку,
ГIеркъи, щеркъи, къоркъол мегьед.
مارها، مارها، ڝێلۈ، ڝێلۈ،
ښێنڬێ غېدۇ، غۇنێب رۈسۇ،
رۈسدال ڞانێ، ڞۈرۈصا كېتۇ،
كۇتۇل عۇندۇل، عۈندۈڨێل ناكۇ،
عېرقێ، ۺېرقێ، قۈرقۈل مېهېد.
ВукIанила Шартилав, кIанцIанила нохъоде,
Беканила квегIаб бохх, кватIанила рокъове,
Вуханила кIодоцца, кIатIанила инссуцца.
وۇگانێلا شارتێلاو، گانڝانێلا نۈڅۈدې،
بېكانێلا كوېعاب بۈخ، كواطانێلا رۈقۈوې،
وۇځانێلا گۈدۈڛا، گاطانێلا ئێنصۇڛا.
ГIалидибир, вай Дибир,
Дур гьакидул гъваргъвари,
ГъалбацIалълъул гIергIери,
ГIангуралълъул хьирхьири,
Хьонда мокъокъил къвакъвай.
عالێدێبێر، واي دێبێر،
دۇر هاكێدۇل غوارغوارێ،
غالباڝاڷۇل عېرعېرێ،
عانڬۇراڷۇل ڮێرڮێرێ،
ڮۈندا مۈقۈقێل قواقواي.
Ицил кверал унтун ругин, катан кье.
Катил цIцIилал ригъун ругин, курак чIвай.
ئێښێل كوېرال ئۇنتۇن رۇڬێن، كاتان ڨې.
كاتێل ڞێلال رێغۇن رۇڬێن، كۇراك ڃواي.
Бакъ щун, щоб ккун,
Щобил ГIали рохьов ун,
Рахьдал гиби гебегун,
Горбогьодал расандун,
Росонир ххинкIал кьурдун,
Кьурда гIачи гIергIедун,
ГIодор бачал мимидун.
باق ۺۇن، ۺۈب ڭۇن،
ۺۈبێل عالێ رۈڮۈو ئۇن،
راڮدال ڬێبێ ڬېبېڬۇن،
ڬۈربۈهۈدال راساندۇن،
رۈسۈنێر خێنگال ڨۇردۇن،
ڨۇردا عاچێ عېرعېدۇن،
عۈدۈر باچال مێمێدۇن.
Чаландарил динг, динг, дун вуссана, ва ясал.
Росе хъуби, речIчIе гIачи, гIорцIун ругин жакъа гьал.
Чаландарил динг, динг, дие пос гIемерлъаги,
ГIачи нужер цIцIикIкIаги, цIу-цIун хъуби нахъе росе, ва ясал!
چالاندارێل دێنڬ، دێنڬ، دۇن وۇصانا، وا ياسال.
رۈسې څۇبێ، رېڄې عاچێ، عۈرڝۇن رۇڬێن جاقا هال.
چالاندارێل دێنڬ، دێنڬ، دێيې فۈس عېمېرڸاڬێ،
عاچێ نۇجېر ڞێڴاڬێ، ڝۇ - ڝۇن څۇبێ ناڅې رۈسې، وا ياسال
Бохх басандун, ракI басандун,
Бис бекерун, канал ричIчIи.
РичIчIи гьороб, гьин хуриб,
Хух магIарда, гIи хьонда.
Хьибил бусада, Салим тIохда.
بۈخ باساندۇن، راگ باساندۇن،
بێس بېكېرۇن، كانال رێڄێ.
رێڄێ هۈرۈب، هێن ځۇرێب،
خۇخ ماعاردا، عێ ڮۈندا.
ڮێبێل بۇسادا، سالێم طۈځدا.
Азалидул зангал ругел дир гIанкIкIил,
Заит кунал къунщби ругел дир гIанкIкIил,
MегIер цIурал гIиял ругел дир гIанкIкIил,
ГIалах цIурал чуял ругел дир гIанкIкIил,
Чода цIакъал васал ругел дир гIанкIкIил,
Басахъ лълъикIал цIцIалал ругел дир гIанкIкIил,
ЦIцIоров цIакъав эмен вугев дир гIанкIкIил,
Гъассда цIакъай эбел йигей дир гIанкIкIил.
ازالێدۇل زانڬال رۇڬېل عانڴێل،
زائێت كۇنال قۇنۺبێ رۇڬېل دێر عانڴێل،
مېعېر ڝۇرال عێيال رۇڬېل دێر عانڴێل،
عالاځ ڝۇرال چۇيال رۇڬېل دێر عانڴێل،
چۈدا ڝاقال واسال رۇڬېل دێر عانڴێل،
باساڅ ڷێگال ڞالال رۇڬېل دێر عانڴێل،
ڞۈرۈو ڝاقاو ئېمېن وۇڬېو دێر عانڴێل،
غاصدا ڝاقاي ئېبېل يێڬېي دێر عانڴێل.
Гьабги наку, добги наку, зобги ссверун, ссанда наку,
Ссанда мокъокъил наку, кьодукь хIанчIчIазул наку.
هابڬێ ناكۇ، دۈبڬێ ناكۇ، زۈبڬێ صوېرۇن، صاندا ناكۇ،
صاندا مۈقۈقێل ناكۇ، ڨۈدۇڨ حانڄازۇل ناكۇ.
Их чIчIун зодил наку, гьарс-вай,
мугIрузда ххарил наку, гьарс-вай,
ХхартIа щубил наку, гьарс-вай,
кьуртIа гIачиязул наку, гьарс-вай,
ГIурухъ бачазул наку гьарс-вай,
цIцIадал иххазул наку гьарс-вай.
ئێځ ڄۇن زۈدێل ناكۇ، هارس - واي،
مۇعرۇزدا خارێل ناكۇ، هارس - واي،
خارطا ۺۇبێل ناكۇ، هارس - واي،
ڨۇرطا عاچێيازۇل ناكۇ، هارس - واي،
عۇرۇڅ باچازۇل ناكۇ هارس - واي،
ڞادال ئێخازۇل ناكۇ هاس - واي.
Бече Баширицца ккун!