ДУН МАГIАРУЛАВ ВУГО

1. ЦIа бакаралълъуве кIкIвелун, кIкIуй баккаралълъуве гьелун.

2. ЦIа босизе арай гьолокьей россассе арайила.

3. ЦIа гьечIеб кIкIуйги кIкIуй гьечIеб цIаги букIунареб.

4. ЦIа гьечIелълъуб кIкIуй букIунареб, лълъим гьечIелълъуб хьуцIцI букIунареб.

5. ЦIа рокъоб ккурай, бакъ рагъида ккурай.

6. ЦIа ссвараб цунтуралда кан бакизе кIоларо.

7. ЦIаги лълъимги асскIоб чIчIоларо, гьекъолдухъанассул чвантиниб гIарац чIчIоларо.

8. ЦIаги лълъимги гIадин рукIунге.

9. ЦIаго бакилалде, кIкIуй бахъарал.

10. ЦIагIел – дур, сакI – дир.

11. ЦIадаб бачIеб чед кунев Бигищ гIадин.

Гъассда кIиябго рахъ кьеризабураб, жиги цIадаб бачIеб (тIаде цIа хъван бежизабичIеб) чедги корол хIамаялда базабун, цо гьитIинаб къваригIелалълъ къватIие ун йиго Бигищил чIчIужу. Гьагъаб параялда рокъове щварав Бигищ чед квине лIугьун вуго.

- Вуйгь! Дуцца гьабулеб жо щиб, Бигищ, цIадаб бачIеб чед кунев! – ан чIчIужуялълъе кIудияб кеп щвараб меххалълъ, Бигищицца абун буго:

- Рецц Аллагьассе буго! Унго, гьединищ иш букIараб! Валлагь-биллагь, дида ккун букIана дунго унтун ватилилан!

12. ЦIадабе бегьараб квер бухIичIого ххутIуларо.

13. ЦIадабе нарт тIолареб.

14. ЦIадул кутак лълъецца чIвалеб, загьрудал кутак даруялълъ чIвалеб, хIалхъублъиялълъул кутак ссунццаниги чIвалареб.

15. ЦIадулгун маххссара те, лълъадалгун божилъи те.

16. ЦIакъ ворххани, тIепула, тIепун чIчIани, ворххула.

17. ЦIакъ къвакIани, бекула, тамахлъани, гьетIула.

18. ЦIакъ лъала гIонкIкIода мугьал щолеб бакI.

19. ЦIакъ хIапулелълъ хIанчIулареб, ккун чIчIоларесс кьабулареб.

20. ЦIакъав чини вугоанила мун, дагьав гIантав гьечIевани.

21. ЦIакъалдасса цIакъаб жо камулареб.

22. ЦIакъго витIаравлъунги вукIунгейила, цIакъго гIакъилавлъунги вукIунгейила.

23. ЦIакъго гьаракь борххунги кIалъаге, кето гIадин, мимидизеги мимидуге

24. ЦIакъго гIакъилассул гьудулзаби дагьалила.

25. ЦIакъго гIемераб бечелъи бокьарав бугелдассаги ватIалъизе бегьула.

26. ЦIакъго рецц бокьулев ххадув беццлъизеги бегьулев, гIинкълъизеги бегьулев.

27. ЦIакъго рокьиялълъила катицца жиндирго тIанчIи кваналел.

28. ЦIакъго хIинкъарассда асскIореги къаларелила щайтIаби, ракI кьвагьун, гьев хвезе гурилан; цIакъав бахIарчияссда асскIореги къаларелила, жидеего зарал гьабиялда хIинкъун.

29. ЦIакъго чIухIарав чIвалев, унти баххчарав холев.

30. ЦIакъго эххеде ворххарав гIодов квеш речIчIулев.

31. ЦIаялде гIагараб гIарахъ бухIичIого ххутIулареб.

32. ЦIаялълъила цIа бакулеб.

33. ЦIел хIалтIи цIецца гурони гьабулареб.

34. ЦІеххезе чи щвечІони, хІохьода цІеххонги, цІеххечІого тогейила.

35. ЦIибаккараб босе, басралъун хвараб нахъе реххе.

36. ЦIиданделъарал росс-лълъади ругеб рокъобе илбис лIугьунаребила, базаралдеги бачун, бичилебилан хIинкъун.

37. ЦIида бацIцIунилан бацIицца бацIил гIамал толареб.

38. ЦIидалълъго раса-цIцIалкIу магIидайила.

39. ЦIиял башмакъазул къуцIи берцинаб, цIияй бахIаралълъул гIеретI гвангъараб.

40. ЦIияб жо лъималазда лъала, умумузда басриябги лълъикI лъала, цIиябги бихьула.

41. ЦIияб нух – цIияб рукъ.

42. ЦIияб ретIел ретIараб басрияб щайтIан.

43. ЦIиябги босе, басриялълъулги къимат гьабе.

44. ЦIиябищ, гьанже гьабурабищ?

45. ЦIиялълъ басрияб хисулеб, басиялълъ оц хисулеб.

46. ЦIубанагIан тIор гIодобе къулула, бечелъанагIан чи эххеде валагьула.

47. ЦIул бугони, гIащтIи камиларо.

48. ЦIулада бараххщун, цIа ссвине тарай,

 ЦIцIилцIцIида бараххщун, рукъ чорок тарай.

49. ЦIулада рекIараб цIа ссунеб, тIулида рекIараб цIа ссунареб.

50. ЦIулада цIа рекIани, бухIун лIугIула, ссуна, рекIеда рекIараб цIа кидаго ссунаро.

51. ЦIулакьодул гъотIода микьир бижуларо.

52. ЦIулалълъ рекъолареб канал ноцIцI гIадав, къадалI рекъолареб гьецIцIо гIадинав.

53. ЦIуна-къай гьечIезул къоял, чияда ццере квералги ккун, унелила.

54. ЦIуна-къай Ираналълъулгун даран-базаралдасса бергьунебила.

55. ЦIуна-къай къарумлъи гуро.

56. ЦIуна-къараб жоялълъе къо камулареб.

57. ЦIураб гIертIинибе лълъим тIолареб.

58. ЦIураб рагIинибе лълъимги тIоге, лълъеда накъищги бахъуге.

59. ЦIуралълъухъ цIураб кьолеб жойила гIорто.

60. ЦIураххинкIазулцин лълъикI гурила бо.